સ્વપ્ન થયું સિદ્ધ

                                                                                                          સ્વપ્ન થયું સિદ્ધ
કતાર એક સમૃદ્ધ દેશ છે.આપણી દેશી ભાષામાં તેલિયા રાજાનો દેશ ! પેટ્રોલ અત્યારે, અહિના એક રૂપિયામાં લીટર.વાત અત્યારે કતાર દેશ વિષે નથી કરતો,પણ થોડી પાર્શ્વ ભૂમિકારૂપે લખું છું.કતારમાં ઓરીજીનલ ખેતી કદાચ ખજૂર સિવાય બીજી ના હોઈ શકે !
એક વાર મોલમાં લીલી મગફળી જોઈકે ખુબ આશ્ચર્ય થયું.લીલી મગફળી નો ઓળો (સેકેલી મગફળી)મને અતિશય પ્રિય છે.અને એમાંય ખાસ કરીને ખેતરમાંથી તાજી તોડેલી મગફળી નો ઓળો ખેતરમાંજ પાડેલો હોય તો તો બસ પેટ ભરાઈ ને ખાયા જ કરવાની !ઇલેક્ટ્રિક સ્ટવ પર સેકી ને મગફળી ખાધી ખુબ મજા આવી ગઈ.ત્યારે મને મારા ખેતરની ભૂમિની યાદ એટલી આવી કે દશ દિવસમાં જ મુલાકાત લેવાનું ટાળી ના શક્યો.

ઘરની બાજુમાં એક લંબ ચોરસ આકારની જગ્યામાં વચ્ચે એક ખજુરીનું જાડ.જોબ પર હોઈએ ત્યારે લેબમાં,ને પરત ફરીએ કે ઘરમાં.જવલ્લે જ શરીર પર તડકો પડે.થી નક્કી કરેલું કે કયારેક ઘરની બહાર સાયલાની રૂએ પગથીયાના ઓટલા પર બેસી ને તડકો ખાવો !તડકો ખાતા ખાતા વિચાર આવ્યો કે મગફળી કતારમાં પાકે કે નહિ ?? ને તાબડતોડ વિચારને અમલમાં મુકવા કટિબદ્ધ થયો.
નાનપણમાં પિતાજી મગફળી પકવતા એટલે એટલી તો ખબર કે સમાન્ય માટીમાં ના પાકે ! અમારા કંપાઉંડ પાછળ એક શેખનું ફાર્મ, વિલાની બારીમાંથી જોવું ને મન લલચાય.આથી ઊંટના છાણ વાળી માટી લઇ આવ્યો.માટી સાથે એને મિશ્ર કરીને ભગવાન નું નામ લઇ મગફળી, ચણા, મગ, તુવેર અને વાલોળનું બીજારોપણ કર્યું.
સાથે આપેલ ચિત્રો મારા એક નાના એવા સ્વપન સિદ્ધ થયાનું પ્રમાણ છે.છોડ ને ફૂલ આવ્યા પછી એટલો આનંદ થયેલો કે હવે મગફળી વધારે નહિ તો થોડી પણ ખવાશે !એક છોડ ખોલીને જોઈ લીધું પણ ખરું.રણમાં વીરડી ફૂટી ને એની શે’ડો મારા મુખ પર અભિષેક કરવા લાગી.