ઘડવૈયા ની મનોદશા

                    ઘડવૈયા ની મનોદશા

પત્થર હાથ વગો કરી લીધો છે આજ, હથોડાનો હાથો બનાવી દીધો રે સજ્જ

ટાંકણાની ધાર ઘસી કાઢી જોઈ તીણી, ધારી ધારી નીરખી આંખો કરી જીણી

તેલ રેડી દીવે મેંતો અજવાળા ભાસ્યા, નજરો ને બાંધી રાખી મનરંગી રસ્યા

મનમાં રાખી છબી કાર્યત કીધા હાથ, રાધા મોહન કે રામ સીતા હો સમરથ

નવદુર્ગા ચામુંડા કે રુદ્રેશ્વરી મહાકાળી, વીણે સરસ્વતી હોય કે નવરાતે તાળી

ડમરુ ધારી શિવ કે મોજીલા શ્રી ગણેશ, કેમ રે ભૂલાય ભલા અંજની પુત્ર પ્રવેશ

ઘાટ ઘડી મનમાં ચાલે ટાંકણું હથોડી, પળો પર પળો વીતે ખોડી રાખી આંખડી

દીસે ના રૂપ કોઈ દીસે ના અંગ મુખ , કેમ લાગે પત્થર હજી રાખી સનમુખ

મુંજાય રે મતિ ને મુંજાય મારું મનડું , શાપ કે રૂસણા હરી, મોઢું થયું આવડું