હું અને મારી દુનિયા

મારા બ્લોગમાં આપનું હાર્દિક સ્વાગત છે.મારી રચનાઓ વાંચવા બદલ ખુબ આભાર !!  

રીતેશ મોકાસણા
દોહા, કતાર.

થોડું મારા વિષે :

પિતાશ્રી   :    સવજીભાઈ
માતુ શ્રી  :    સમજુબેન
પત્ની      :     કલા
બાળકો    :    પુત્રી – પલક , પુત્ર – કલ્પ.
ગામ : જન્મભૂમિ-ભાડુકા….વતન-સાયલા…..કર્મભૂમિ-સુરત.( હાલ દોહા, કતાર-મિડલ ઇસ્ટ)
વ્યવસાય : નોકરી , શેલ જી.ટી.એલ. રીફાઇનરી Qatar Shell GTL LTD.  (રોયલ-ડચ,બર્મા-શેલ )
કાર્યક્ષેત્ર : લેબોરેટરી

ભાડુકા એ સાયલા તાલુકાનું એક નાનકડું ગામ છે.ગામની શોભા અનેરી છે.ગામની ભાગોળે મોટું તળાવ છે ને તળાવની પાળ પર મોટા મોટા ઝાડ છે.એક બોરડીના ઝાડ નો અમે ખુબ ઉપયોગ કરતા.બોરડીના મીઠા બોર મનને હજી પણ લલચાવે છે.ગામથી થોડે જ દુર નદી છે.જે નદી આગળ જઈ ખંભાતના અખાત ને મળે છે.જેના પર સુરેન્દ્રનગર પાસે ધોળીધજા ડેમ આવેલો છે. તળાવ અને નદી માં ન્હાવાનો ખુબ આનંદ માણેલો. હજી પણ ભારતમાં આવું ત્યારે જન્મભૂમિ ની મુલાકાત લેવાનું ટાળતો નથી.બાળપણના  સ્મરણો હજી પણ વાગોળવાનું મન થાય છે.ને જયારે પણ બાળપણના એ મધુરા દિવસો યાદ આવે ત્યારે તે ભીની માટીની ખુશ્બુ દુર પરદેશ માં પણ મનને લોભાવે છે ત્યારે દોડી જઈ તેમાં આળોટવાનું મન થાય છે.મને આજ પણ યાદ છે કે આકાશમાં દુર વિમાન નો અવાજ આવે એટલે આંખો વાદળોમાં ખોડી રાખીને અવાજ બંધ ના થાય ત્યાં સુધી વિમાન દેખાય કે ના દેખાય પણ જોઈ રહેતા.ક્યારેક વિમાન દેખાતું ત્યારે હું મારા મિત્રોને  કહેતોકે  એકવાર  પણ  હું વિમાન માં બેસીશ,ત્યારે બધા મને પાગલ ગણી મારી હસી ઉડાવતા. જયારે આજે, એક દિવસ ભગવાનની કૃપાથી હું ચાર વર્ષ સુધી રીતસર વિમાન માં અપડાઉન જેમ ભારત માં આવતો જતો દર દોઢ મહીને.બારીમાંથી દેખાતા ઉડતા વાદળો સાથે હું સંદેશો મારા એ મિત્રોને  મોકલતો  કે ‘ હું  પાગલ નહોતો ‘ એક આત્મ વિશ્વાસ નો શ્વાસ લઈને.

પ્રાથમિક શિક્ષણ દરમિયાન જ પિતાએ ધંધો વિકસાવવા સાયલા સ્થળાંતર કર્યું ને ગામડાનું જીવન ગુમાવ્યાનો વસવસો થયેલો ને સાથોસાથ વધુ ભણવાની જીજીવિષા એ જીવન નો રસ ઘેરો બનાવ્યો. ઉચ્ચ શિક્ષણ  અમદાવાદ હોસ્ટેલમાં રહીને લીધું. બારમાં ધોરણ સુધી ગુજરાતીમાં ભણ્યા પછી કોલેજ માં ઈંગ્લીશ મીડીયમ માં ભણવાનું કેટલું અઘરું થઇ પડેલું તે ઘણી વાર રોમાંચ લાવેછે.પણ મનમાં અઘરી ને વિકટતા  નો મનમાં કીડો સળવળતો એટલે અમુક ખાસ મિત્રો ગુજરાતી મીડીયમ માં  હોવા છતાં મેં ઈંગ્લીશ મીડીયમ માં ભણવાનો નિર્ધાર કર્યો. સી. યુ. શાહ સાયન્સ કોલેજમાં ગ્રેજયુએશન પૂરું કરીને,મનમાં કોઈ પણ દવા બનાવતી કંપની માં નોકરી કરવાનું મક્કમ કરી ને પિતાને ખુશ ખબરી આપી પણ મારી ખુશી લાંબો સમય ના ચાલેલી.ક્યારેય પણ પરદેશ જઈને કમાવાના સપના જોયા નહોતા. કે નતો કદી એના માટે પ્રયત્ન કરતો. કદાચ મારા નસીબમાં પરદેશ જવાનું લખેલ હશે એટલે શેલ કંપનીમાં મિત્રના કહેવાથી એપ્લાય કર્યું ને નસીબની બલિહારી અને પરમેશ્વરની કૃપાથી કતાર દેશમાં વસવાટ કરવાનું મુનાસીબ બન્યું.

લખવાની પ્રેરણા દશમાં ધોરણથી થયેલી.એકવાર બારીમાંથી વરસાદ વરસતો જોઈ રહ્યો હતોને કાવ્ય લખાઈ ગયું ‘મેઘ તારા આવવાથી’.ને આજ સુધી લખવાની ધગશ દિલમાં ધરબાયેલી છે જે આજ દિન પર્યંત વહી રહી છે.મારા દિલમાં છુપાયેલો સાહિત્યકાર શ્રી મુનશી,પન્નાલાલ પટેલ,મેઘાણીજી કે કલાપી ,વગેરે જેવા મુર્ધન્યો ને આભારી છે.મારી દ્રષ્ટીએ હ્રદયના આવેગ ને તેના થકીના મંથનની ઉપજ એજ સાહિત્ય.અત્યારે મને સાલ યાદ નથી પણ ઘણા વર્ષ પહેલા જય હિન્દ ની રવિપૂર્તિમાં મારી એક લઘુનવલ સિલેક્ટ થયેલી.કદાચ કોઈ ને યાદ હોય તો ‘ બેઘડી સંગ’  નામનો એક વિભાગ આવતો તેમાં મારી કૃતિ ‘ઓ બેવફા ‘પ્રસિદ્ધ થયેલી.ગુજરાત સમાચાર માં એકવાર મારી કૃતિને ઇનામ મળેલું પણ તે પ્રસિદ્ધ થઇ કે કેમ તેની મને જાણ નથી કારણ કે પછી કોલેજમાં અંગ્રેજી માધ્યમ માં ભણવાનું હોઈ બધીજ લખવાની પ્રવૃત્તિને ત્રણ વર્ષ માટે બાજુ પર રાખવાની ફરઝ પડેલી,સાથોસાથ ક્રિકેટ ને વોલીબોલ રમવાનું પણ. કતાર આવ્યા બાદ, નવીનતમ રમત લૉન ટેનિસ રમવાનું નિયમિત રીતે ચાલુ થઇ ગયું.

નાનો હતો ત્યારે ચાંદામામા મેગેઝીન વાંચતો ને પછી લાઈબ્રેરીમાં પુસ્તક ઘેર વાંચવા માટેનું ખાતું ખોલાવી લીધું. અડુકિયો દડુકિયો , છકો મકો બકોર પટેલ માંથી સમય બદલાતા નવલિકા, સાહસ , શૌર્ય ને નવલકથાઓ નો દોર આજ પર્યંત ચાલુ રહ્યો.મારા પર નરસિંહ મહેતા,મીરાબાઈ, કબીર,પાનબાઈ,કાલિદાસ, મેઘાણી, સુન્દરમ , કલાપી, રવીન્દ્રનાથ ટાગોર,પન્નાલાલ, ધૂમકેતુ, દયારામ, નર્મદ જેવા અનેક સાહિત્યકારોનો પ્રભાવ રહ્યો છે.જયારે કંઈપણ વાંચવાનું ના મળે ત્યારે મારી પોતાની કૃતિઓ વાંચુ છું ને એ બહાને કોઈ ત્રુટી જણાય તો સુધરી પણ જાય.હું એમ કહુકે મારો આત્મા હંમેશા સાહિત્યમાં રસપ્રચુર રહ્યોછે તો તે અતિશયોક્તિ નથી.મન માં એક અફસોસ છે કે આજ પર્યંત મારી એક પણ નવલકથા પુસ્તકના રૂપે પ્રગટ થઇ નથી.ભગવાનને પ્રાર્થના કરુછું કે છેલ્લા શ્વાસ પહેલા એટલી મદદ કરજે.

મારા ગુરુ :
મારી દ્રષ્ટીએ ગુરુ એને માની શકાય જેના થકી જ્ઞાન પ્રાપ્ત થયું હોય.હું ખુબ નાનો હતો ત્યારે ઉમેદગીરી નામના મહંતે કાનમાં કશું કહેલું ને ઘરના લોકો એ એવું કહેવામાં આવેલું કે ઉમેદગીરી મારા ગુરુ છે.હું એમને શત શત પ્રણામ કરુછું. પણ મને જેમના થકી જ્ઞાન નો થોડો પણ ઉદય થયો તે મારા ગુરુ શ્રી અનંતરાય રાવલ કે જે મારા વર્ગ શિક્ષક હતા.મને અક્ષરજ્ઞાન આપવામાં મોજેપુરી સાહેબનો અથાગ ફાળો છે.હું ચાર વર્ષનો હતો ,મારા મોટાભાઈ નિશાળે જતા તો હું પણ રોઈને એમની સાથે રોજે જતો. જયારે હું ચાર વર્ષનો થયો ત્યારે મારી ભણવાની ધગશ જોઇને મોજેપુરી સાહેબે મારી ઉંમર એક વર્ષ વધારીને મને પહેલા ધોરણ માં બેસાડી દીધેલો.

મારા આદર્શ :
નાનો હતો ત્યારથી હંમેશા વિકટતાને પડકારનો સમાનો કરવાની ખેવના ની સાથોસાથ ધગશ પણ ખરી.ધીરુભાઈ અંબાણી જેવા મહાન વ્યક્તિઓ કે જેમને શૂન્યમાંથી સર્જન કર્યું તેમને હંમેશા માનથી જોઉં.હું એવો કોઈ મહાન માણસ નથી એક સામાન્ય અદના આદમી કે જેની ગુજરાતમાં તો ઠીક પણ મારા એરીઆમાં પણ કોઈ સ્થાન નથી.અત્યારનો યુગ એટલો ફાસ્ટ છે કે બધા જાણે છે તેમ.મારા મોટાભાઈ ભણતા ત્યારે પુસ્તક વાંચીને પરીક્ષા આપતા.ત્યાર પછી ગાઈડ,અપેક્ષિત ને હાલ તો લાસ્ટ મોમેન્ટ રીમેડી.કેટલું પરિવર્તન !!   ભવાઈમાંથી નાટક,સિનેમા ને ટીવીથી યુ-ટ્યુબ.તસ્દી લઈને રીફર કરવાનો જમાનો હવે નથી.મારો બ્લોગ બનાવી મારે લખવું છે તો મારા વિષે કંઇક લખવાની ધગશને રોકી શકતો નથી.મનમાં આવેલી વસ્તુ પાછળ શક્ય બને ત્યાં સુધી મથી રહું.કદી પણ મનમાં નેગેટીવ વિચારોને ઘુસવા નથી દેતો.પ્રભુની કૃપાથી મારા આદર્શોને જ વળગી રહીને જીવવાની કોશિશ કરું છું.

જીવનમાં કંઇક કરી લેવાની કે બતાવવાની ભાવના જીવન ને વધુ જીવવા મજબુર કરેછે. સ્વાર્થ,ઈર્ષ્યા,ગુસ્સો,સેવા,ભક્તિ,હરીફાઈ,માફી કે ધગશ આ બધા ગુણો બધાના જીવનમાં થોડા વત્તા અંશે સમાયેલા હોયછે.શ્વાસ લેવા માટે વિચારવું નથી પડતું કે નથી કોઈ યોજના બનાવવી પડતી.મારી દ્રષ્ટીએ સ્વાભાવિક ઘટનાઓ ને વહેતી રાખીને તેને જાળવી રાખવા જેવું એકપણ ડહાપણ નથી.મનના મનોરથ ને સપના પુરા કરવા કોઈની લાગણી ના દુભાય તેની કાળજી રખાય, કોઈને પણ તેના થકી ખોટ ના જાય, કોઈનો ભોગ ના લેવાય અને મારું સન્માન  જળવાય તે માટે હંમેશા ભગવાન ને પ્રાર્થના કરું છું. મીઠા સપના જોવા કોને ના ગમે ? કદાચ પાગલ માણસ પણ ક્યારેક સપના જોતો હશે. સપના ની દુનિયા માં વિહરવાની મઝા કંઈક ઓર જ હોય છે. દરેક માણસ કોઈને કોઈ મંઝીલ બનાવી ને ત્યાં પહોંચવા માટે બધા પ્રયત્નો કરી ચુકે છે. નાનો હતો ત્યારથી ઘણા સપનાઓ જોયેલ.ઘણા સિદ્ધ થયા ને હજી ઘણા બાકી છે. પરમેશ્વર ની કૃપાથી ચહેરા પર સદાય સ્મિત ફેલાયેલું હોય ને સમય આપણી ઈર્ષ્યા કરતો હોય ત્યારે જીવન ધન્ય માનવું.

મિત્રો, વડીલો અને ભગવાનની અસીમ કૃપાથી મારી પહેલી બુક એક નવલિકા સંગ્રહના રૂપમાં પ્રગટ થઇ ગઈ છે. મારો આનંદ શેર કરવા માટે બે શબ્દો લખું છું. આગળ મેં લખેલું કે ” મન માં એક અફસોસ છે કે આજ પર્યંત મારી એક પણ નવલકથા પુસ્તકના રૂપે પ્રગટ થઇ નથી.ભગવાનને પ્રાર્થના કરુ છું કે છેલ્લા શ્વાસ પહેલા એટલી મદદ કરજે.”  મારી પ્રાર્થના ભગવાને સાંભળી છે. મારું પ્રથમ પુસ્તક નવલિકા સંગ્રહ ‘તારલિયા ભાગ-1 ‘ પ્રકાશિત થયેલ છે. જેના માટે હું શ્રી ચંદ્રવદન મિસ્ત્રીજીનો આભાર માનું એટલો ઓછો છે. મારું બીજું પુસ્તક ‘ મારી ઉંમર તને મળી જાય ‘ પણ પ્રકાશિત થયું. જેનું વિમોચન જાણીતા કથાકાર રામાયણી શ્રી પૂજ્ય મોરારી બાપુના હસ્તે થયું છે. જે મારા માટે હર્ષ અને ગૌરવની લાગણી છે. અને હવે તો વિશ્વાસ પણ દ્રઢ થતો જાય છે કે હજી પણ મારા બીજા પુસ્તકો પ્રકાશિત થશે.ભગવાન પર મને અસીમ શ્રદ્ધા છે.મારી હર એક મુશ્કેલ ઘડીમાં મને મદદ કરતા રહે છે.શત શત વંદન ! હરિની અમાપ કૃપા દ્રષ્ટિથી મારું ત્રીજું પુસ્તક સાચો શણગાર પ્રકશિત થયું. અમેઝોન અને ફ્લિપકાર્ટ પર આ પુસ્તક આપને વાંચવું હોય તો મળી જશે.

મારી નવલકથા ‘ મારી ઉંમર તને મળી જાય ‘ પુસ્તક રૂપે પ્રકાશિત થઇ એજ સાથે; પુસ્તક પ્રેરિત ગુજરાતી ફિલ્મ ઓલવેયઝ રહીશું સાથે રિલીઝ થઇ. મારે માટે એ સૌભગ્ય ની વાત છે કે મારી પ્રથમ ગુજરાતી ફિલ્મ અને પ્રથમ નવલકથા એકસાથે લોન્ચ થયા. પહેલી ફિલ્મની સફળતાએ ભગવાને બીજી પણ ગુજરાતી ફિલ્મ બનાવવવની શક્તિ અર્પી. જેના થકી એક વર્ષ બાદ 2017માં મારી બીજી ગુજરાતી ફિલ્મ બોસ હવે તો ધમાલ રિલીઝ થઇ. મારી ત્રીજી ગુજરાતી ફિલ્મ ચાહત રીતે રિલીઝ પણ નહોતી કરી ત્યાં મારા માટે એક ઔર ફિલ્મ ડિરેક્ટ કરવાની ચેલેંજ. આથી મારી બીજી ડિરેક્ટ અને પ્રોડ્યુસ કરેલી ગુજરાતી ફિલ્મ હાથતાળી ને સરળતાથી સેન્સર સર્ટિફિકેટ મળી ગયું. આ ફિલ્મ ને જુલાઈ કે ઓગષ્ટ મહિનામાં રિલીઝ કરવાની ગણતરી છે. કેમ કે એના રિલીઝ બાદ તરત જૂન મહિનામાં શૂટિંગ કરેલી નેક્સ્ટ ફિલ્મ કન્યા પધરાવો સાવધાન નિર્માણ પામી રહી છે.

પગલે પગલે ચિત્કાર નવલકથા પૂરી કરેલ છે જે મારી ડ્રીમ નવલકથા છે. આશા રાખું કે એને પણ ન્યાય મળે. ગર્વ નથી કરતો પણ એટલું ચોક્કસ કહીશ કે આ નવલકથા વાંચ્યા પછી તમે કશું નવું વાંચ્યાનો અહેસાસ કરશો.આપ સૌના સ્વપનો પણ ભગવાન પુરા કરે એવી દિલથી પ્રાર્થના કરું છું. સૌનો ખુબ ખુબ આભાર !!!!!!!!

 સરળ વાંચન માટે—–> કાવ્યો/ ગઝલો, નવલિકા, પ્રકીર્ણ, હાસ્યલેખ/ જોક્સ |